Qirg‘iziston sobiq prezidentining o‘g‘li va bir qator siyosatchilar hibsga olindi
Ular ommaviy tartibsizliklarni rejalashtirganlikda gumonlanmoqda.
Qirg‘izistonda sobiq prezident Almazbek Atambayevning o‘g‘li Qodirbek Atambayev hamda bir qator siyosiy arboblar ommaviy tartibsizliklarni uyushtirishga tayyorgarlik ko‘rganlikda gumonlanib hibsga olindi. Bu haqda mamlakat Ichki ishlar vazirligi matbuot xizmati xabar berdi.
Vazirlik ma’lumotlariga ko‘ra, qo‘lga olinganlar orasida Milliy xavfsizlik davlat qo‘mitasining sobiq rahbari Damir Musakeyev, Sotsial-demokratik partiya yetakchisi Temirlan Sultonbekov, sobiq deputatlar Shaylobek Atazov va Kubanichbek Qodirovlar ham bor.
Huquq-tartibot idoralari ushbu shaxslar parlament saylovi natijalari e’lon qilingach, ommaviy norozilik kayfiyatini uyg‘otish maqsadida bir qator noqonuniy yig‘inlar rejalashtirganini bildirgan. Tergov materiallariga ko‘ra, ular “konstitutsiyaga zid talablar qo‘yish”, ma’muriy binolar, telekanallar, xavfsizlik obyektlari va jazoni ijro etish muassasalarini egallashga urinishni muhokama qilgan.
Tintuv vaqtida qurol-yarog‘, o‘q-dorilar, granatalar, aloqa vositalari, moliyaviy hujjatlar, giyohvand moddalar hamda 150 ming AQSh dollari miqdoridagi naqd pul musodara qilingan. Ayblanuvchilarga Jinoyat kodeksining “Ommaviy tartibsizliklar uyushtirishga tayyorgarlik ko‘rish” moddasi bo‘yicha ayblov qo‘yilgan.
Temirlan Sultonbekov sud qarori bilan 17-yanvargacha hibsda qoldirildi. Shuningdek, Ermek Ermatov va Urmat Asqarbekovlar ham tergov hibsxonasiga joylashtirilgan. Qodirbek Atambayev, Damir Musakeyev, Shaylobek Atazov va Kubanichbek Qodirovlarning hibsga olinishi bo‘yicha sud jarayoni davom etmoqda.
22-noyabr kuni sobiq prezidentning rafiqasi va yana bir farzandi huquq-tartibot organlariga so‘roq uchun chaqirilgan. O‘sha kuni iqtisodiy jinoyatlar bo‘yicha davlat xizmatining sobiq rahbari Syimik Japikeev ham hibsga olingani haqida xabar berildi.
Shu bilan birga, sentyabr oyida Bishkek sudi Kloop axborot portalining ikki sobiq xodimini ommaviy tartibsizliklarni qo‘zg‘atganlikda aybdor deb topib, besh yilga ozodlikdan mahrum etgan edi. Mahalliy OAV vakillari davom etayotgan jarayonlarni “siyosiy bosim” deb baholamoqda.
