Ekologiya milliy qo'mitasi barcha qurilish kompaniyalarini ogohlantirdi
Talablar buzilganda jarima, faoliyatni 10 kun to‘xtatish yoki tugatish choralari qo‘llanadi.
O‘zbekiston Respublikasi Ekologiya va iqlim o‘zgarishi milliy qo‘mitasi barcha qurilish tashkilotlariga qurilish jarayonida atmosfera havosini muhofaza qilishga doir talablar qat’iy bajarilishi shartligi haqida rasmiy ogohlantirish yo‘lladi.
Qonunchilik talablariga ko‘ra, qurilish maydonlarida quyidagi majburiy choralar amalga oshirilishi kerak:
— qurilish jarayonida chang va qum zarrachalarining havoga ko‘tarilishiga yo‘l qo‘ymaslik;
— kirib-chiqish yo‘laklarida osma yomg‘irlatgichlar va suv purkagichlar o‘rnatish;
— avtotransport vositalari g‘ildiraklarini majburiy yuvish uchun maxsus yuvish posti tashkil etish;
— chang tarqalishini cheklash maqsadida maydonni to‘siqlar, himoya qoplamalari yoki maxsus materiallar bilan jihozlash.
Ko‘rsatilgan talablarning bajarilmasligi Ma’muriy javobgarlik to‘g‘risidagi kodeksga muvofiq jarima va boshqa choralar qo‘llanishiga olib kelishi mumkin. Qoidabuzarlik aniqlanganda faoliyat 10 ish kunigacha vaqtincha to‘xtatilishi yoki belgilangan tartibda butunlay tugatilishi ehtimoli ham mavjud.
