Saida Mirziyoyeva Toshkentdagi ekologik vaziyat bo‘yicha tezkor yig‘ilish o‘tkazdi
Prezident administratsiyasi rahbari tomonidan dolzarb muammoga barham berish bo’yicha ishlab chiqilgan kompleks takliflar davlat rahbariga ko‘rib chiqish uchun kiritiladigan Prezident Farmoni loyihasi uchun asos bo‘lib xizmat qiladi.
Bugun O‘zbekiston Respublikasi Prezidenti Administratsiyasi rahbari Saida Mirziyoyeva Toshkent shahridagi havoning ifloslanish darajasini kamaytirish bo‘yicha yig‘ilish o‘tkazdi. Tadbirda Administratsiya hamda aloqador idoralar rahbarlari ishtirok etdi va poytaxtdagi ekologik vaziyatni baholadi.
Yig‘ilishda so‘nggi kunlarda havoning yuqori darajada ifloslanayotgani, aholi salomatligi uchun xavf tug‘dirayotgani qayd etildi. Mas’ullar fuqarolardan kelib tushgan murojaatlar, jamoatchilik takliflari va havo sifatini yaxshilash bo‘yicha hisobotlarini taqdim etdi.
Saida Mirziyoyeva ekspert xulosalariga tayangan holda tezkor, o‘rta va uzoq muddatli chora-tadbirlarni belgiladi. Ular orasida ekologik nazoratni kuchaytirish, ifloslantiruvchi obyektlar faoliyatini cheklash, qurilish talablarini qat’iylashtirish, shaharni keng ko‘lamda ko‘kalamzorlashtirish va havo sifatini monitoring qilish tizimini joriy etish kiradi.
Belgilangan chora-tadbirlar yaqin orada davlat rahbariga taqdim etiladigan Prezident Farmoni loyihasi uchun asos bo‘lib xizmat qiladi. Ushbu qadamlar aholi salomatligini himoya qilish va atrof-muhitni yaxshilashga qaratilgan bo‘lib, amaliyotga joriy etilishi kutilyapti.
