Toshkentda 490 gramm “gashish” yashirilgan kuryer jo‘natmasi qo‘lga olindi
Tezkor tadbir davomida jo‘natma va uni qabul qiluvchilar bir vaqtning o‘zida fosh etilgan.
Toshkent shahridagi “Toshkent-AERO” IBK tezkor xodimlari tomonidan giyohvand moddalarni yashirin tarzda yetkazishga urinish fosh etildi. Tezkor tadbir davomida 490 gramm og‘irlikdagi “gashish” saqlangan kuryer jo‘natmasi aniqlanib, uni qabul qilayotgan shaxs qo‘lga olindi.
Mirobod tumanida o‘tkazilgan tadbir chog‘ida, hujjatlarga ko‘ra qutida kosmetika vositalari va shirinliklar bo‘lishi kerak edi. Ammo tekshiruv natijasida ushbu qog‘oz quti ichidan 490 gramm “gashish” giyohvandlik moddasi topildi. Jo‘natmani olib, pochta bo‘limidan chiqayotgan fuqaro tezkor xodimlar tomonidan to‘xtatildi.
Tadbir davom ettirilib, ushbu jo‘natmani olishi kerak bo‘lgan ikkinchi fuqaro ham qo‘lga olindi. Uning yashash xonadoniga o‘tkazilgan tekshiruv vaqtida giyohvand moddalarni “zakladka” usulida yashirishga mo‘ljallangan magnit toshlar, elektron tarozilar, izolyentlar va boshqa vositalar topildi.
Hozirda holat yuzasidan bojxona organlari tomonidan surishtiruv ishlari olib borilmoqda.
