Turkistondan Urganch, Buxoro va Samarqandga to‘g‘ridan-to‘g‘ri reyslar yo‘lga qo‘yiladi
Qozog‘iston aviakompaniyasi dekabrdan uchta yo‘nalishda muntazam parvozlarni boshlaydi.
Qozog‘istonning SCAT aviakompaniyasi dekabr oyidan boshlab Turkiston shahridagi Hazrat Sulton xalqaro aeroportidan O‘zbekistonning uchta shahri — Urganch, Buxoro va Samarqandga to‘g‘ridan-to‘g‘ri aviaqatnovlarni yo‘lga qo‘ymoqda. Bu haqda Uzbekistan Airports xabar berdi.
Urganch yo‘nalishidagi parvozlar 1 dekabrdan haftaning dushanba, juma va yakshanba kunlari amalga oshiriladi. Buxoro yo‘nalishidagi qatnovlar 2 dekabrdan seshanba, payshanba va shanba kunlari uchiriladi. Samarqandga reyslar esa 3 dekabrdan boshlab chorshanba, juma va yakshanba kunlari bajariladi.
Rasmiy ma’lumotga ko‘ra, yangi yo‘nalishlar ikki davlat o‘rtasidagi transport aloqalarini kengaytirib, mintaqa bo‘ylab sayohat qilishni yanada qulaylashtiradi.
Avgust oyida O‘zbekiston va Qozog‘iston aviatsiya sohasidagi hamkorlikni rivojlantirishga kelishib olgan edi. Endilikda ikki davlat o‘rtasida haftasiga 238 ta reysga ruxsat berilgan bo‘lib, yo‘nalishlar soni bosqichma-bosqich kengayib bormoqda.
