Ekoenspektroni kaltaklagan Buvayda hokimi o‘rinbosari ishdan odindi
Hokimlik va IIB holat bo‘yicha qo‘shimcha axborot berdi.
Avvalroq Farg‘ona viloyati Buvayda tumanida Nayman qishlog‘idagi zovur atrofida daraxtlarning noqonuniy kesilgani va jarayon vaqtida tuman hokimi o‘rinbosari tomonidan Ekologiya qo‘mitasi inspektoriga nisbatan qarshilik ko‘rsatilgani haqida xabar berilgandi.
Mazkur holat yuzasidan mutasaddilar tomonidan ishchi guruh tuzildi va o‘rganish ishlari olib borilgan. O‘rganish ishlari natijasida Buvayda tumani hokimi o‘rinbosari S.Xizirov lavozimidan ozod etilgan.
“Shuningdek, holat bo‘yicha viloyat prokuraturasi tomonidan ish qo‘zg‘atilgan bo‘lib, hozirda surishtiruv harakatlari amalga oshirilmoqda. Yakuni bo‘yicha hokim o‘rinbosarining xatti-harakatlariga qonuniy baho beriladi”, deyiladi xabarda.
Viloyat IIBning munosabat bildirishicha, Buvayda tumani Ekologiya qo‘mitasi inspektorini IIBga olib kelinganligi bo‘yicha axborot haqiqatga to‘g‘ri kelmaydi.
Hozirda Farg‘ona viloyat hokimiyati hamda huquqni muhofaza qiluvchi organlari tomonidan tuzilgan ishchi guruh tomonidan Buvayda tumani hokimligi vakillarining xatti-harakatlariga huquqiy baho berish bo‘yicha o‘rganish ishlari olib borilmoqda.
