BMT yangi bosh kotibni saylash jarayonini rasman boshladi

 

Birlashgan Millatlar Tashkiloti a’zo davlatlardan 2027-yil 1-yanvardan lavozimga kirishadigan bosh kotib lavozimiga nomzodlarni ko‘rsatishni so‘radi. Bu haqda Reuters agentligi xabar bermoqda. Mazkur jarayon BMT Xavfsizlik kengashi raisi hamda Bosh assambleya prezidenti tomonidan yuborilgan qo‘shma maktub orqali boshlangan bo‘lib, u amaldagi bosh kotib Antonio Guterrishni almashtirish jarayonining rasmiy boshlanishi hisoblanadi.

 

Maktubda tashkilot tarixida biror marotaba ayol shaxs bosh kotib lavozimini egallamaganiga urg‘u berilgan. Shu munosabat bilan davlatlardan yuqori rahbarlik lavozimida gender tengligini ta’minlash maqsadida ayol nomzodlarni ko‘rib chiqishga alohida e’tibor qaratish so‘ralgan.

 

Shuningdek, nomzodlarni tanlashda mintaqaviy balans va xilma-xillik muhim mezonlardan biri sifatida qayd etilgan.

 

BMT Xavfsizlik kengashi 2026-yil oxiriga qadar 10-bosh kotib lavozimi uchun bitta nomzodni tanlab, uni Bosh assambleyaga tavsiya qiladi.

 

Hozircha ommaviy ravishda e’lon qilingan nomzodlar orasida Chilining sobiq prezidenti Mishel Bachelet, Kosta Rikaning sobiq vitse-prezidenti Rebeca Grynspan, argentinalik diplomat, Xalqaro atom energiyasi agentligi (XAEA) rahbari Rafael Grossi bor.

 

Bosh kotib bo‘yicha yakuniy qaror BMT Xavfsizlik kengashining veto huquqiga ega besh doimiy a’zosi — AQSH, Rossiya, Buyuk Britaniya, Xitoy va Fransiya — o‘zaro kelishuviga erishganidan so‘ng qabul qilinadi.