O‘zbekistonda “Zo‘ravonlikka qarshi 16 kun” ijtimoiy-ma’rifiy tadbirlari boshlandi
Ayollarni himoya qilish, reabilitatsiya va huquqiy qo‘llab-quvvatlash bo‘yicha mavjud xizmatlar jurnalistlarga tanishtirildi.
Bugun ayollarga nisbatan tazyiq va zo‘ravonlikning oldini olish bo‘yicha mamlakatda amalga oshirilayotgan ishlar yuzasidan jurnalistlar va blogerlar uchun press-tur tashkil etildi.
Ma’lumki, 25 noyabr — Xotin-qizlarga nisbatan zo‘ravonlikka barham berish xalqaro kuni. Ushbu sana 1999 yilda BMT Bosh Assambleyasi tomonidan ayollarga qarshi tazyiqlarga e’tiborni kuchaytirish va profilaktika choralarini samarali tashkil etish maqsadida ta’sis etilgan.
Shu munosabat bilan O‘zbekistonda “Zo‘ravonlikka qarshi 16 kun” ijtimoiy-ma’rifiy tadbirlari boshlandi. Ijtimoiy himoya milliy agentligi va Ayollarni reabilitatsiya qilish va moslashtirish Respublika markazi tomonidan press-tur davomida mavjud tizimlar tanishtirildi.
Markazlarda ayol va qizlarga kasb-hunar o‘rgatish yo‘lga qo‘yilgan bo‘lib, hozirda IT, pishiriqchilik, chevarchilik, bolalar massaji, ayollar sartaroshligi kabi yo‘nalishlarda o‘qitish amalga oshirilmoqda. Ishtirokchilarga tadbirkorlik va moliyaviy savodxonlik bo‘yicha ham qo‘shimcha ko‘nikmalar berilmoqda.
Zo‘ravonlikdan jabrlanganlarni qo‘llab-quvvatlash maqsadida birlamchi ko‘mak xonalari tashkil etilgan. Bu yerda ayollar va ularning voyaga yetmagan farzandlariga shoshilinch tibbiy, psixologik, huquqiy va ijtimoiy xizmatlar ko‘rsatiladi. Agar chuqur reabilitatsiya zarur bo‘lsa, ular tegishli markazlarga yo‘naltiriladi.
Shuningdek, ijtimoiy xizmatlar to‘liq raqamlashtirilgani qayd etildi. Yangi elektron modul orqali himoya orderlari va jabrlanuvchilar haqidagi ma’lumotlar “Inson” markazlariga real vaqt rejimida yetkazilmoqda. Bu tizim yordamga muhtojlarni tezkor aniqlash va zarur xizmatlarni o‘z vaqtida ko‘rsatish imkonini bermoqda.
