Shavkat Mirziyoyev yetti mamlakat elchilaridan ishonch yorliqlarini qabul qildi
Prezident yangi tayinlangan elchilarni tabriklab, o‘zaro hamkorlikni yanada kengaytirish muhimligini ta’kidladi.
27 noyabr kuni O‘zbekistonga yangi tayinlangan bir qator davlatlarning favqulodda va muxtor elchilari ishonch yorliqlarini topshirdi. Bu haqda Prezident matbuot xizmati xabar berdi.
Marosimda Prezident Shavkat Mirziyoyev Gretsiyadan Paraskevi Tseveleki, Indoneziyadan Siti Ruhayni Dzhuhayatin, Latviya elchisi Girts Yaunzem, Fransiyadan Valid Fuk, Rossiyadan Aleksey Erkhov, Yaponiyadan Kendzi Hirata va Tojikistondan Nasriddin Ismatullo topshirgan ishonch yorliqlarini qabul qildi.
Davlat rahbari elchilarni samimiy tabriklab, hozirgi beqaror global sharoitda diplomatlar faoliyati yanada muhim ahamiyat kasb etayotganini qayd etdi.
Uning so‘zlariga ko‘ra, elchilar yurtimizda bo‘lgan qisqa vaqt davomida O‘zbekistonning jadal rivojlanish sur’atlari va mamlakatning xalqaro diplomatiyadagi nufuzi tobora oshib borayotganiga o‘z ko‘zlari bilan guvoh bo‘lmoqda.
Shuningdek, so‘nggi yillarda O‘zbekistonda nufuzli xalqaro tadbirlar — Toshkent xalqaro investitsiya forumi, Parlamentlararo ittifoqning 150-yubiley assambleyasi, “Markaziy Osiyo — Yevropa Ittifoqi” birinchi sammiti, Xalqaro iqlim forumi va YuNESKO Bosh konferensiyasining tarixiy sessiyasi muvaffaqiyatli o‘tkazilgani ta’kidlab o‘tildi.
O‘zbekiston tashabbusi bilan BMT Bosh Assambleyasi tomonidan so‘nggi yillarda 13 ta rezolyutsiya qabul qilingani ham alohida eslatildi.
Prezident mamlakatning Global barqaror rivojlanish maqsadlari indeksida 19 pog‘ona yuqorilagani, so‘nggi sakkiz yilda iqtisodiyot ikki baravardan ko‘proqqa oshgani va kambag‘allik darajasi 35 foizdan 6,6 foizga kamaygani haqida ma’lumot berdi.
Shavkat Mirziyoyev, shuningdek, elchilar vakillik qilayotgan davlatlarning O‘zbekistonning Jahon savdo tashkilotiga a’zo bo‘lish jarayonini qo‘llab-quvvatlayotganidan minnatdorlik bildirdi.
Marosim yakunida davlat rahbari yangi elchilarga faoliyatlarida katta muvaffaqiyatlar tilab, ikki tomonlama hamkorlikni mustahkamlash uchun mavjud barcha imkoniyatlardan samarali foydalanishga chaqirdi. Shu bilan birga, hududlar va xususiy sektor bilan faol ishlashni tavsiya etdi.
Xorijiy diplomatlar esa iliq qabul va yaratilgan qulay shart-sharoitlar uchun minnatdorlik bildirib, O‘zbekiston bilan ko‘p qirrali hamkorlikni rivojlantirishga tayyor ekanini ta’kidladi.
