Raqobat qo‘mitasi Telegram’da dollar va yevrodagi ko‘chmas mulk reklamasini taqiqladi
Ayrim Telegram kanallariga ogohlantirish berildi.
Raqobatni rivojlantirish va iste’molchilar huquqlarini himoya qilish qo‘mitasi bir qator mashhur Telegram kanallarida ko‘chmas mulk narxlarining xorijiy valyutada e’lon qilinishi bo‘yicha qonunbuzilish holatlarini aniqladi.
Qayd etilishicha, ayrim kanallar kvartira va uylar narxini dollar yoki yevroda ko‘rsatib kelgan. Bu esa “Reklama to‘g‘risida”gi qonunning 16-moddasi talablariga zid bo‘lib, reklama materiallarida chet el valyutasida narxlar ko‘rsatishni taqiqlaydi.
Shuningdek, “Valyutani tartibga solish to‘g‘risida”gi qonunning 9-moddasiga muvofiq, O‘zbekiston hududida barcha to‘lovlar va narxlar faqat milliy valyutada belgilanishi, ularni chet el valyutasiga bog‘lash esa qat’iyan man etiladi.
Qo‘mita tomonidan kanal ma’murlari bilan tushuntirish ishlari olib borildi. Natijada reklama e’lonlari qonun talablari asosida qayta tartibga solindi va mazmuni milliy valyuta bo‘yicha ko‘rsatildi.
