2025-yildan 100 ta “Eng yaxshi soliq to‘lovchi mahalla”ga 2 mlrd so‘mdan ajratiladi
G‘olib mahallalar loyihalar uchun qo‘shimcha imtiyozlarga ega bo‘ladi va rag‘bat mablag‘i infratuzilmani yaxshilashga yo‘naltiriladi.
Yangi yildan boshlab har yili “Eng yaxshi soliq to‘lovchi mahalla” sifatida e’tirof etilgan 100 ta mahallaga davlat budjetidan 2 milliard so‘mdan mablag‘ ajratiladi. Ushbu tashabbus mahallalarning soliq intizomini oshirish va faolligini rag‘batlantirishga qaratilgan.
Rag‘bat choralariga ko‘ra, tashabbusli budjet doirasida ketma-ket ikki marotaba g‘olib bo‘lgan mahallalarda navbatdagi mavsumlarda loyiha kiritishni cheklash tartibi qo‘llanmaydi. Shuningdek, loyiha qiymatining 25 foizi aholi tomonidan moliyalashtirilsa, qolgan 75 foizi davlat tomonidan qoplab beriladi.
Tanlov mezonlariga ko‘ra birinchi 100 talikka kirgan mahallalarning har biri 2 milliard so‘mlik mablag‘ni “Mahalla ijtimoiy-iqtisodiy muammolarini hal etish jamg‘armasi” orqali oladi. Ushbu mablag‘ mahalla infratuzilmasini yaxshilash, obodonlashtirish va aholiga qulayliklarni oshirishga yo‘naltiriladi.
