Atrof-muhitni ifloslantirgan 464 ta huquqbuzarlik aniqlanib, 250 mln so‘mdan ortiq jarima qo‘llandi
Toshkent shahri va viloyatida o‘tkazilgan uch kunlik ekologik reydlar davomida 1 157 ta ob’ekt tekshirilib, 59 ta korxonaning faoliyati 10 ish kuniga to‘xtatildi.
Ekologiya va atrof-muhitni muhofaza qilish bo‘yicha mas’ul idoralar tomonidan Toshkent shahri va viloyatida o‘tkazilgan uch kunlik keng ko‘lamli reydlar yakunlari bo‘yicha rasmiy ma’lumot berildi.
Maxsus komissiya topshirig‘iga muvofiq, 25–28 noyabr kunlari Ekologik nazorat bo‘yicha davlat inspeksiyasi (Ekopolitsiya) Bosh prokuratura, Favqulodda vaziyatlar vazirligi, Milliy gvardiya va ichki ishlar organlari bilan hamkorlikda Qibray, Zangiota, Yangiyo‘l tumanlari, shuningdek, Toshkent shahrining bir qator hududlarida atrof-muhitga ta’sir ko‘rsatuvchi obyektlar faoliyatini o‘rganish bo‘yicha tekshiruvlar o‘tkazdi.
Tekshiruvlar davomida jami 1 157 ta obyektning havo sifatiga oid ekologik talablarga rioya qilishi o‘rganildi. Reydlar yakunlariga ko‘ra quyidagi natijalar qayd etildi:
- 464 ta huquqbuzarlik aniqlanib, ularga nisbatan 250 million so‘mdan ortiq jarima qo‘llandi;
- Atrof-muhitga zarar yetkazgani aniqlangan 59 ta obyektning faoliyati 10 ish kuniga vaqtincha to‘xtatildi (shundan Toshkent viloyatida — 50 ta, Toshkent shahrida — 9 ta);
- 15 ta issiqxona havoga chiqarilayotgan zararli moddalarni kamaytirish maqsadida filtr uskunalari bilan jihozlandi.
Ekopolitsiyaning ta’kidlanishicha, reydlar davom etmoqda va ekologik me’yorlarning buzilishiga nisbatan nazorat yanada kuchaytiriladi. Atrof-muhitga zarar yetkazuvchi korxonalar faoliyati qat’iy tartibda baholanib, qonunbuzilish holatlariga nisbatan keskin choralar ko‘riladi.
