Farg‘onada 866 g gashish va 4 508 dona kuchli ta’sir qiluvchi dori vositalarining savdosi aniqlandi
Jinoyat sodir etgan shaxslar qo‘lga olinib, qamoq ehtiyot chorasi qo‘llandi.
Davlat xavfsizlik xizmati, Ichki ishlar vazirligi hamda Bojxona organlarining hamkorligida Farg‘ona viloyatida giyohvandlik vositalarining noqonuniy savdosi va tarqalishining oldini olishga qaratilgan bir qator tezkor tadbirlar amalga oshirildi. Bu haqda DXX Zamon.uzga xabar berdi.
O‘tkazilgan tezkor chora-tadbir davomida Marg‘ilon shahrida yashovchi 1996-yilda tug‘ilgan fuqaroning “Matiz” rusumli avtomashinasi belgilangan tartibda ko‘zdan kechirildi. Tekshiruv jarayonida transport vositasi salonidan 866 gramm “gashish” moddasi topilib, ashyoviy dalil sifatida rasmiylashtirib olindi.
Dastlabki maʼlumotlarga ko‘ra, gumonlanuvchi mazkur giyohvandlik vositasini sotish orqali noqonuniy daromad olishni rejalashtirgani aniqlangan.
Holat yuzasidan fuqaroga nisbatan O‘zbekiston Respublikasi Jinoyat kodeksining 25 orqali 273-moddasi 5-qismi bilan jinoyat ishi qo‘zg‘atilib, unga nisbatan qamoq ehtiyot chorasi qo‘llandi. Hozirda tergov harakatlari olib borilmoqda.
Yana bir tezkor maʼlumot asosida Farg‘ona va Andijon shaharlarida yashovchi bir guruh shaxslarning kuchli taʼsir qiluvchi dori vositalarini noqonuniy realizatsiya qilib kelayotganliklari aniqlanib, ular Davlat xavfsizlik xizmati, Ichki ishlar va Bojxona organlari tomonidan Farg‘ona shahrida qo‘lga olindi.
Jarayon davomida Andijon viloyati Qorg‘ontepa tumanida yashovchi ikki nafar shaxs Qirg‘iziston Respublikasidan kontrabanda yo‘li bilan olib kirilgan 4 508 dona “Regapen” kuchli taʼsir qiluvchi dori vositasini xaridorga 12 800 AQSh dollariga sotayotgan vaqtida qo‘lga olingan.
Mazkur holat yuzasidan ularga nisbatan Jinoyat kodeksining 28 orqali 246-moddasi 1-qismi va 251-prim 1-moddasi 5-qismi bo‘yicha jinoyat ishi qo‘zg‘atilib, qamoq ehtiyot chorasi qo‘llandi. Tergov harakatlari davom etmoqda.
