Latviyada prezident va bosh vazir suratlarini chop etish taqiqlandi
Yuqori martabali amaldorlar tasvirlarini tarqatish endi asosli sababni talab qiladi.
Latviyada prezident Edgars Rinkevics, bosh vazir Evita Silina va boshqa yuqori lavozimli davlat amaldorlarining fotosurat hamda videolarini internetda chop etishni tartibga soluvchi yangi taqiq kuchga kirdi. Latviya Inson huquqlari bo‘yicha idorasi ma’lumotiga ko‘ra, ushbu cheklovning joriy etilishiga amaldorlar haqidagi tasvirlarning ortiqcha va asossiz ravishda ko‘p e’lon qilinayotgani sabab bo‘lgan.
Yangi qoidalarga binoan, davlat amaldorlarining fotosuratlarini olish yoki tarqatish faqat xolis, asosli zarurat mavjud bo‘lgan taqdirda ruxsat etiladi. Rasmiylar fikricha, so‘nggi paytlarda amaldorlar tasvirlari bo‘yicha nashrlar haddan ziyod ko‘paygan va ular ko‘pincha hech qanday qonuniy ehtiyojga asoslanmagan.
Belgilangan taqiqni buzgan shaxslar ma’muriy javobgarlikka tortilishi mumkin. Ayrim og‘irroq holatlarda esa qoidabuzarlar jinoyat ishi bo‘yicha ham javob berishi ehtimoldan xoli emas.
