O‘qituvchilar apellyatsiyasi bekor qilinmadi — Vazirlik
Ijtimoiy tarmoqlarda tarqalgan apellyatsiya bekor qilingani haqidagi xabarlar rad etildi. Ta'lim vazirligi o‘zgarishlar faqat jarayonni soddalashtirishga qaratilganini bildirdi.
Ijtimoiy tarmoqlarda tarqalgan, go‘yoki o‘qituvchilar uchun attestatsiya natijalari yuzasidan apellyatsiya berish imkoniyati bekor qilingani haqidagi xabarlar jamoatchilikda keskin munosabat uyg‘otdi. Maktabgacha ta’lim va maktab ta’limi vazirligi mazkur ma’lumotlar haqiqatga mos kelmasligini rasman ma’lum qildi.
Vazirlikning ta’kidlashicha, 26-noyabr kuni VM-740-son qarori bilan joriy etilgan o‘zgarishlar o‘qituvchilarga qo‘shimcha qulaylik yaratish maqsadida qabul qilingan. Endilikda pedagoglar test sinovlari jarayonida — test.uzedu.uz platformasi orqali bevosita onlayn tarzda apellyatsiya arizasi yuborish yoki norozilik bildirish imkoniga ega bo‘ladilar.
Apellyatsiya jarayonini jadallashtirish maqsadida komissiya malakali mutaxassislarni imtiyozli asosda jalb qilishi mumkin. Bu esa ziddiyatli holatlarni tezkor ko‘rib chiqish va baholash jarayonining aniq hamda shaffof bo‘lishini ta'minlaydi.
Rasmiy izohlarga ko‘ra, kiritilgan o‘zgarishlar apellyatsiya berish huquqini bekor qilmagan, balki mavjud tartibni soddalashtirgan. Ko‘rib chiqilgan arizalar bo‘yicha komissiya qarori darhol arizachining shaxsiy kabinetiga yuboriladi.
Zaruratga ko‘ra, o‘qituvchiga komissiya qaroridan ko‘chirma taqdim etilishi yoki hujjatlar bilan bevosita tegishli tashkilotda tanishib chiqish imkoniyati yaratiladi.
