O‘zbekistonda kartoshkachilik bo‘yicha uchta yangi normativ-huquqiy hujjat tasdiqlandi
Yangi tartiblar mini-tuganaklar moliyalashtiruvi, “in-vitro” o‘simliklar talablari hamda shartnomalarni hisobga olish tizimini belgilaydi.
O‘zbekistonda kartoshkachilik yo‘nalishini rivojlantirish maqsadida uchta yangi normativ-huquqiy hujjat qabul qilindi. Birinchi hujjat Qishloq xo‘jaligi vazirligiga respublika budjeti hisobidan ajratiladigan mablag‘lar orqali virus va bakteriya kasalliklaridan xoli kartoshkaning mini-tuganaklarini yetishtirish xarajatlarini moliyalashtirish tartibini belgilaydi.
Ikkinchi hujjat kartoshkaning “in-vitro” o‘simligi, mikro va mini-tuganaklarini tayyorlash hamda yuqori avlodli urug‘lik kartoshka yetishtiriladigan hududlar va ishlab chiqaruvchilarga qo‘yiladigan talablarni tasdiqlaydi.
Uchinchi tartib esa ixtisoslashtirilgan tumanlardagi kartoshka yetishtiruvchi korxonalar, ilmiy muassasalar va tadbirkorlik subyektlari o‘rtasida mini-tuganaklar bo‘yicha tuziladigan shartnomalarni ro‘yxatdan o‘tkazish va yuritish mexanizmini belgilaydi.
