Tramp Bayden tomonidan avto-qalam bilan imzolangan barcha hujjatlarni bekor qildi
AQSh prezidentining ta'kidlashicha, bu sobiq davlat rahbari tomonidan imzolangan hujjatlarning taxminan 92 foizini tashkil etadi.
AQSh prezidenti Donald Tramp Jo Bayden tomonidan avtomatik imzolash qurilmasi – “avto-qalam” orqali tasdiqlangan barcha ijro farmoyishlarini bekor qildi. Bu haqida Tramp o‘zining Truth Social sahifasida ma’lum qildi deydi TASS nashri.
Trampning ta’kidlashicha, bekor qilingan hujjatlar Bayden prezidentlik davrida imzolangan barcha farmoyishlarning qariyb 92 foizini tashkil etadi.
Prezidentning yozishicha, “Uyqusirab Jo Bayden qalam yordamida imzolagan har qanday hujjatlar endilikda o‘z kuchini yo‘qotadi. Agar AQSh prezidenti shaxsan ruxsat bermasa, avtomatik imzolash qurilmasidan foydalanish taqiqlanadi”.
Tramp “radikal so‘l demokratlar Baydenning prezidentlik vakolatlarini amalda egallab olganini” iddao qildi. Uning fikricha, Bayden o‘zi bevosita imzolamagan barcha ijro buyruqlari haqiqiy kuchga ega bo‘lmagan, chunki avtomatik imzo qo‘llangan hujjatlar “noqonuniy” hisoblanadi.
Shuningdek, Tramp Baydenning 2500 dan ortiq shaxs – jumladan, ayrim qarindoshlarini afv etish haqidagi farmoyishlar ham avto-qalam orqali imzolanganini, shu bois ularni haqiqiy emas deb hisoblash mumkinligini bildirdi.
Avvalroq Bayden The New York Times’ga bergan intervyusida afv etish bo‘yicha barcha qarorlar shaxsan o‘zi tomonidan qabul qilinganini, biroq hujjatlar soni ko‘pligi sabab avto-qalamdan foydalanishga to‘g‘ri kelganini aytgandi. Iyul oyida Oq uy Bayden tomonidan avtomatik imzo qurilmasidan foydalanilgan holatlar yuzasidan tekshiruv boshlaganini tasdiqlagan edi.
