Zelenskiy Ukraina prezidenti devonining rahbari Andrey Yermakni ishdan bo‘shatdi
Bunga uning uyida va devonxonada antikorrupsion organlari tomonidan olib borilgan tintuvlar, energiya sektoridagi yuqori darajadagi korrupsiyani aniqlash holatlari sabab bo'lgan.
Vladimir Zelenskiy o‘zining prezidentlik apparati rahbari va eng yaqin safdoshi Andrey Yermak iste’foga chiqish haqida ariza berganini va uni qabul qilganini ma’lum qildi.
"Hech kimning Ukrainaga savol bermasligini istayman. Shuning uchun bugun quyidagi ichki qarorlar qabul qilinadi. Birinchidan, Ukraina prezidenti devoni qayta ishga tushiriladi. Devonxona rahbari Andrey Yermak iste'foga chiqish haqida ariza berdi", - dedi Ukraina prezidenti.
Yermakning iste’fosiga zamin bo‘lgan asosiy sabab — uning uyida va devonxonada antikorrupsion organlari tomonidan olib borilgan tintuvlardir. Bu tergovlar Ukraina energetika sohasidagi yuqori darajadagi korrupsiyani fosh etish bilan bog‘liq bo‘ldi.
Zelenskiy bildirganidek, ichki qarorlar doirasida devon boshqaruvi qayta ishga tushiriladi va yangi rahbar tayinlash bo‘yicha maslahatlar shanba kuni o‘tkaziladi.
Ukraina prezidenti Yermakning xizmatlarini e’tirof etdi, ammo korrupsiya surishtiruvi va shov‑shuvlar fonida barqarorlikni saqlash uchun bu qaror zarur deb ta’kidladi. Yermak iste’fosi Ukrainadagi ichki siyosiy va diplomatik barqarorlikni ta’minlashga yo‘naltirilgan.
