1 dekabrdan O‘zbekistonda qanday o‘zgarishlar kuchga kiradi?
Yangi tartiblar zilzila xavfsizligi, iste’molchilar huquqlari, nikoh jarayoni va ekologik ochiqlikni o‘z ichiga oladi.
1 dekabrdan O‘zbekistonda seysmik xavfsizlikka oid yagona onlayn platforma ishga tushadi. Unda ehtimoliy zilzilalar bo‘yicha akselerogrammalar, seysmik rayonlashtirish xaritalari, faol tektonik uzilmalar va mintaqaviy tavakkalchilik ko‘rsatkichlari jamlanadi. Ushbu o‘zgarishlar zilzila xavfi yuqori hududlarda loyihalashtirish sifatini oshirishga xizmat qiladi.
Shu sanadan boshlab iste’molchilarning murojaatlarini ko‘rib chiqishning yangi tartibi ham joriy etiladi. Endi shikoyatlar birinchi navbatda tadbirkor tomonidan 10 kun ichida ko‘rib chiqiladi, hal etilmasa Raqobat qo‘mitasi yoki NNTlarga yuboriladi. Tadbirkorlikni qo‘llab-quvvatlash kompaniyasi esa yirik loyihalarga kafillik hajmini oshirib, garov yetishmasligi bo‘yicha qo‘llab-quvvatlash mexanizmlarini kuchaytiradi.
Nikohni rasmiylashtirish jarayoniga ham o‘zgartish kiritilib, tibbiy ma’lumotnoma talabi bekor qilinadi. Nikohdan sud orqali ajrashganlar endi sud qarorini FHDYga topshirishi shart emas — ma’lumot almashinuvi tizim orqali avtomatik amalga oshiriladi. Nikoh shartnomalarining aslini talab qilish bekor qilinib, elektron nusxalar “Notarius” tizimiga joylashtiriladi.
Ekologiya va raqamlashtirish yo‘nalishida ham yangiliklar mavjud. Atrof-muhit monitoringi, ko‘chat ekish, parvarish bo‘yicha ma’lumotlar ochiq tizimga joylashtiriladi. Shu bilan birga, turizm mutaxassislarini qayta tayyorlaydigan xalqaro akademiya Samarqandda ish boshlaydi, nodavlat sud ekspertlari mustaqil faoliyat yuritishi mumkin bo‘ladi, huquqiy hujjatlarni tahlil qiluvchi yangi platforma esa tizimga joriy etiladi.
