Boysun gaz konidan yana kuchli oqim ko‘tarilgani aks etgan video tarqalmoqda
Energetika vazirligi tarqalgan videolar avval kuzatilgan geologik jarayon bilan bog‘liq ekanini aytmoqda.
Ijtimoiy tarmoqlarda Surxondaryoning Boysun tumanida gaz sizib chiqayotgani aks etgan videolar tarqaldi. Energetika vazirligining ma’lum qilishicha, videodagi holat “M-25” konining 202-son qudug‘ida bir hafta oldin kuzatilgan geologik jarayon bilan bog‘liq.
Vazirlikka ko‘ra, quduqda avvaldan yoqib qo‘yilgan olov geologik o‘zgarishlar sabab vaqtincha so‘ngan. Mutaxassislar bu holat qisqa muddat ichida barqarorlashtirilgani va olov qayta yoqilganini bildirdi.
Ayni vaqtda “M-25” konida vaziyat to‘liq nazorat ostida. Barcha jarayonlar texnik talablar asosida, mutaxassislar kuzatuvida amalga oshirilayotganini rasmiylar ta’kidladi.
Avvalroq berilgan rasmiy axborotga ko‘ra, havoga zararli moddalar tarqalishining oldini olish maqsadida gazni yoqib qo‘yish amaliyoti qo‘llanilgan. Bu usul xalqaro sanoat xavfsizligi standartlariga mos bo‘lib, atrof-muhitni himoya qilishda odatiy texnologik choradir.
