O‘zbekistonda birinchi ekologik o‘rmonlar tasnifi taqdim etildi
CITES konferensiyasi doirasida o‘rmon ekotizimlarini ilmiy tasniflash bo‘yicha yangi metodologiya e’lon qilindi.
CITESga a’zo davlatlarning 20-konferensiyasi doirasida “Tabiat loyihalari: bioxilma-xillikni saqlash uchun o‘rmonlarning ekologik tasnifi” mavzusida maxsus tadbir o‘tkazildi. Unda O‘zbekiston o‘rmon ekotizimlarini ilmiy asosda tasniflash bo‘yicha ishlab chiqilgan birinchi kompleks tizim jamoatchilikka taqdim etildi. Tadbirda Zamon.uz muxbiri ishtirok etdi.
Tadbirda ekologiya vaziri o‘rinbosari Obidjon Qudratov va “Yashil loyiha” instituti direktori Olim Hakimov O‘zbekiston tabiiy resurslarini baholash, ekotizimlarni monitoring qilish hamda ularni barqaror boshqarishda ilmiy yondashuvning ahamiyatini ta’kidladi.
Yangi tizim sun’iy intellekt, sun’iy yo‘ldosh tasvirlari, GIS ma’lumotlari va raqamli kartografiyalashga asoslanib, noyob turlar yashaydigan hududlarni aniqlash, ekologik xavf xaritalarini yaratish va CITES uchun ilmiy ma’lumotlar tayyorlash imkonini beradi.
Tadbir davomida quyidagi masalalar muhokama qilindi:
– ekologik tasnifning noyob turlarni himoya qilishdagi o‘rni;
– RESILAND loyihasi natijalarini milliy rejalashtirishga integratsiya qilish;
– olingan ma’lumotlardan CITES monitoringi va hisobotida foydalanish;
– mintaqaviy ekologik hamkorlik;
– mahalliy hamjamiyatlarning tabiatni muhofaza qilishdagi ishtiroki.
Mutaxassislarning aytishicha, ushbu ekologik tasnif O‘zbekiston o‘rmonlarini barqaror boshqarish va bioxilma-xillikni samarali himoya qilishda strategik ahamiyatga ega bo‘lib, mamlakatning birinchi kompleks raqamli ilmiy platformasiga aylandi.
