O‘zbekistonlik alpinist Himolaydagi Island Peak cho‘qqisini zabt etdi
Aitova 6189 metrlik marraga chiqqan ilk o‘zbekistonlik ayol sifatida tarixga kirdi.
O‘zbekistonlik alpinist Alyona Aitova Hindiston va Nepal chegarasidagi Himolay tizmasida joylashgan mashhur Island Peak (Imja Tse) cho‘qqisiga muvaffaqiyatli ko‘tarildi. 6189 metr balandlikka yetgan ushbu marraga chiqish unga o‘zbekistonlik ayollar orasida birinchi bo‘lish sharafini berdi.
Mutaxassislarning ta’kidlashicha, Island Peak Everest tomon yo‘nalishning muhim bosqichi bo‘lib, baland tog‘ sharoitiga moslashish, jismoniy chidamlilik va texnik tayyorgarlikni talab qiladigan murakkab cho‘qqilar qatoriga kiradi. Marshrutning so‘nggi qismi muzliklar, tik qor-muz yonbag‘irlari va 50–65 daraja qiyaliklardan iborat.
Ko‘tarilish jarayoni maxsus mahkamlangan arqonlar bo‘ylab jumar yordamida amalga oshiriladi, tushish esa alpinistlar orasida keng qo‘llaniladigan “sakkizlik” qurilmasi bilan bajariladi. Shu bois Island Peak oddiy trek emas, balki to‘liq texnik mahoratni talab qiluvchi jiddiy alpinistik sinov sifatida baholanadi.
