Ukraina urushi Rossiyada nogironlar sonining rekord oshishiga olib keldi
Rasmiy statistika 2023–2024 yillarda nogironlar soni 190 ming nafarga ko‘payganini ko‘rsatmoqda.
Ukraina bilan davom etayotgan urush Rossiyada nogironlar sonining keskin oshishiga sabab bo‘ldi. The Moscow Times yozishicha, bu ko‘rsatkich Pskov yoki Janubiy Saxalin aholisi soniga teng bo‘lgan “nogironlar armiyasi” paydo bo‘lganini anglatadi.
Rossiya Ijtimoiy jamg‘armasi ma’lumotlariga ko‘ra, mamlakatda 2023–2024 yillar mobaynida nogironlar umumiy soni 190 ming nafarga ko‘paygan. O‘tgan yil yakuniga kelib, Rossiyada nogironlar soni 11 million 122 ming kishiga yetgan — bu ko‘rsatkich 2023 yilda 11,04 million, 2022 yilda esa 10 million 932 ming nafardan iborat edi. Mutaxassislar buni 2007 yildan buyon eng yuqori o‘sish sur’ati sifatida baholamoqda.
Xalqaro strategik tadqiqotlar instituti (IISS) hisob-kitoblariga ko‘ra, 2024 yilning oxiriga kelib, 376 ming rossiyalik jang maydonida og‘ir jarohatlar natijasida nogiron bo‘lib qolgan. Institutning umumiy bahosiga ko‘ra, Rossiya armiyasining 2022–2024 yillardagi yo‘qotishlari qariyb 783 ming kishini tashkil etgan. Ulardan taxminan 172 ming nafari halok bo‘lgan, 611 ming kishi esa jarohatlangan. Jarohat olganlarning 235 ming nafari tuzalib ketgan bo‘lsa, qolgan qismi umr bo‘yi nogironlik darajasiga ega bo‘lgan.
