Ichki ishlar vazirligi departamenti tibbiyot xodimlarining xavfsizligini shartnoma asosida ta’minlaydi
Shuningdek transport va tibbiyot muassasalarida xavfsizlikni kuchaytirish uchun tez yordam va avtobuslar sirenalar bilan jihozlanadi.
O‘zbekiston Respublikasi Prezidenti tomonidan 28-noyabr kuni qabul qilingan qarorga muvofiq, Ichki ishlar vazirligi huzuridagi Qo‘riqlash boshqarmasi faoliyatini kengaytirish va zamonaviylashtirish choralari belgilandi.
Yangi tartibga ko‘ra, Qo‘riqlash boshqarmasi davlat va xususiy sektor obyektlari – maktablar, tibbiyot muassasalari, savdo va qurilish obyektlariga pullik qo‘riqlash xizmatlari ko‘rsatish huquqiga ega bo‘ladi. Xizmatlar shartnoma asosida, zamonaviy texnologiyalar, monitoring tizimlari, AKT va sun’iy intellektdan foydalangan holda tashkil etiladi.
Qaror doirasida ayniqsa transport sohasi hamda sog‘liqni saqlash muassasalarida xavfsizlikni mustahkamlashga alohida e’tibor qaratildi. Departament Transport vazirligi va Sog‘liqni saqlash vazirligi bilan hamkorlikda avtobuslar hamda tez tibbiy yordam mashinalarini bosqichma-bosqich sirenalar bilan jihozlash, ulardan foydalanish qoidalarini belgilash va tibbiyot xodimlarining xavfsizligini ta’minlash choralarini amalga oshiradi. Bu chora tibbiyot xodimlariga nisbatan oxirgi paytlarda kuzatilayotgan tajovuzlar va hujumlarning oldini olishga qaratilgan.
Shuningdek, Qo‘riqlash boshqarmasi tomonidan mavsumiy xavfsizlik xizmatlari ko‘rsatish, xavfli yuklarni kuzatib borish, obyektlarni masofadan monitoring qilish, signalizatsiya, vahima tugmalari va videokuzatuv tizimlarini o‘rnatish huquqi ham beriladi. Davlat va xususiy ta’lim muassasalari istaklariga ko‘ra qo‘riqchilarni shartnoma asosida jalb qilishlari mumkin bo‘ladi.
Hududlarda xavfsizlikni kuchaytirish maqsadida mahalla qo‘riqlash inspektori lavozimi joriy etildi. Shuningdek, aholining xabardorligini oshirish uchun xavfsizlik agentliklariga onlayn platformalar va ijtimoiy tarmoqlarda maqsadli reklama joylashtirishga ruxsat berildi.
