Navoiyda ham ekologiya inspektori kaltaklandi
Brakonyerlar qo‘lga tushmaslik uchun o‘zlariga yordam sifatida Buxoro viloyatidan jinoiy guruhlarga mansub shaxslarni chaqirgan.
Navoiy viloyatining Qiziltepa tumanida noqonuniy ov bilan shug‘ullanib yurgan bir guruh brakonyerlar viloyat ekologiya boshqarmasi tezkor guruhi xodimi I.Xo‘jayevning qonuniy talablariga bo‘ysunmay, unga nisbatan kuch ishlatgan.
Dastlabki ma’lumotlarga ko‘ra, brakonyerlar qo‘lga tushmaslik uchun o‘zlariga yordam sifatida Buxoro viloyatidan jinoiy guruhlarga mansub shaxslarni chaqirgan va ularning ko‘magi bilan voqea joyidan yashiringan.
Navoiy viloyati IIB tomonidan holat bo‘yicha surishtiruv ishlari olib borildi. Videodagi shaxslarning barchasi aniqlanib, Ichki ishlar bo‘limiga olib kelindi.
Tekshiruv davomida Buxoro viloyatidan kelgan 5 nafar fuqaro “To‘dako‘l” suv havzasi hududida noqonuniy ov qilgani, ekologiya boshqarmasi inspektorining to‘xtash haqidagi qonuniy talablariga bo‘ysunmagani va unga kuch ishlatgani ma’lum bo‘ldi.
Avtomashina yukxonasini ko‘zdan kechirish chog‘ida 1 dona yovvoyi quyon, 2 dona yovvoyi o‘rdak hamda saqlash uchun ruxsatnomasi mavjud bo‘lgan 4 dona ov quroli aniqlanib hujjatlashtirildi.
Hozirda Qiziltepa tumani IIB tomonidan barcha zarur ekspertizalar tayinlangan bo‘lib, holat yuzasidan tergovga qadar tekshiruv harakatlari olib borilmoqda.
Avvalroq ekoenspektroni kaltaklagan Buvayda hokimi o‘rinbosari ishdan odingani haqida xabar berilgan edi.
