Nurafshonda hokim yordamchisi 2 ming dollar pora bilan ushlandi
U avval ham bir necha bor sudlangan.
Nurafshon shahridagi mahalla fuqarolar yig‘inlaridan birida faoliyat yuritgan hokim yordamchisi Toshkent shahrida yashovchi fuqaroga mansabdor tanishlari orqali Ekologiya va iqlim o‘zgarishi milliy qo‘mitasining Toshkent viloyati boshqarmasiga ishga joylashtirib qo‘yishni va’da qilgan. U ushbu “xizmati” evaziga 2 ming AQSh dollari miqdorida pul talab qilgan.
Davlat xavfsizlik xizmati Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbir davomida hokim yordamchisi so‘ralgan pulni tanishlari orqali olayotgan vaqtida qo‘lga olingan va uning noqonuniy faoliyatiga chek qo‘yilgan.
Aniqlanishicha, ushbu shaxs avval ham bir necha bor sudlangan bo‘lsa-da, qilgan qilmishlaridan tegishli xulosa chiqarmagan.
Hozirda mazkur holat yuzasidan Jinoyat kodeksining 168-moddasi 3-qismi “v” bandi hamda 28, 211-moddasi 1-qismi bilan jinoyat ishi qo‘zg‘atilib, unga nisbatan qamoq ehtiyot chorasi qo‘llangan.
Tergov harakatlari olib borilmoqda.
