Toshkentda Onix haydovchisi piyodani urib yubordi — piyoda halok bo‘ldi
YTH dan so‘ng avtomashina Nexia-3 va Cobalt bilan ham to‘qnashib ketgan.
Joriy yilning 28-noyabr kuni soat 11:10 da Yunusobod tumani Abdulla Qodiriy ko‘chasida yo‘l-transport hodisasi sodir bo‘ldi. Dastlabki tergov ma’lumotlariga ko‘ra, 1994-yilda tug‘ilgan haydovchi boshqaruvidagi Onix rusumli avtomobil harakatlanish jarayonida rul boshqaruvini yo‘qotgan.
Natijada avtomobil yo‘lning o‘ng chetida turgan piyodani urib yuborgan. To‘qnashuvdan keyin transport vositasi o‘ng qatorda to‘xtab turgan Nexia-3 va Cobalt avtomashinalari bilan ham to‘qnashgan.
YTH oqibatida piyoda olgan og‘ir tan jarohatlari natijasida voqea joyida vafot etgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Tergov jarayonlari davom etmoqda.
