Qozog‘iston orqali Rossiyaga ketadigan o‘zbekistonliklar ogohlantirildi
Aqtau shahridagi Bosh konsullik O‘zbekiston fuqarolariga chegarani buzish yoki noqonuniy migratsiyani tashkil etish jinoiy javobgarlik va qamoq jazosiga olib kelishi mumkinligini ta'kidladi.
O‘zbekistonning Aqtau shahridagi Bosh konsulligi qo‘shni Qozog‘iston Respublikasida davlat chegarasini noqonuniy kesib o‘tish holatlari ortib borayotgani haqida ogohlantirdi. Diplomatik vakolatxona ma’lumotiga ko‘ra, so‘nggi kunlarda O‘zbekiston fuqarolari tomonidan noqonuniy chegaradan o‘tishga urinishlar bir necha bor qayd etilgan.
Mazkur shaxslar Qozog‘iston Jinoyat kodeksining:
392-moddasi — davlat chegarasini qasddan noqonuniy kesib o‘tish;
394-moddasi — noqonuniy migratsiyani tashkil etish bandlari asosida javobgarlikka tortilgan.
Shuningdek, joriy yilning sentabr oyidan boshlab qo‘shni davlat ushbu turdagi huquqbuzarliklar uchun jazoni yanada qat’iylashtirgan. Endilikda chegarani buzish holatlari uzoq muddatli qamoq jazosiga sabab bo‘lishi mumkin.
Bosh konsullik vatandoshlarni noqonuniy sxemalarga aldanmaslikka, davlat chegarasini noqonuniy kesib o‘tish yoki bunga urinish jinoiy javobgarlikka olib kelishini unutmaslikka chaqirdi.
