Toshkent viloyatida 5 ta korxonaning chiqindi uchun asossiz 8,8 mlrd so‘m undirgani fosh etildi
250 ming isteʼmolchiga noto‘g‘ri qo‘llangan chiqindi to‘lovlari qayta hisoblab beriladi.
Raqobat qo‘mitasining Toshkent viloyati hududiy boshqarmasi tomonidan maishiy chiqindi tashish xizmatlari bo‘yicha o‘tkazilgan o‘rganishlar natijasida bir qator korxonalar tomonidan isteʼmolchilarga ko‘rsatilgan xizmatlarda jiddiy kamchiliklar aniqlangan.
Tekshiruv davomida ayrim xonadonlardan chiqindi umuman olib ketilmagan bo‘lsada, ularga muntazam ravishda to‘lovlar hisoblangani, shuningdek xizmat ko‘rsatish sifati belgilangan mezonlarga javob bermagani maʼlum bo‘ldi.
Hududiy boshqarma Maxsus komissiyasi tomonidan 5 ta MCHJga nisbatan “Isteʼmolchilar huquqlarini himoya qilish to‘g‘risida”gi qonun talablarining buzilgani yuzasidan ish qo‘zg‘atildi.
O‘rganish yakuniga ko‘ra, 250 mingga yaqin isteʼmolchiga 8,8 milliard so‘mdan ortiq asossiz undirilgan mablag‘larni qayta hisob-kitob qilib berish bo‘yicha qaror qabul qilindi. Shuningdek, aniqlangan qonunbuzilishlarni bartaraf etish hamda kelgusida bunday holatlarning oldini olish bo‘yicha tegishli ko‘rsatmalar berildi.
Qo‘mita respublikaning barcha hududlarida isteʼmolchilar huquqlarini himoya qilishga qaratilgan tizimli o‘rganishlarni davom ettirmoqda.
