AQSh Lotin Amerikasidagi giyohvand moddalar savdosi obyektlariga zarba berishni boshlaydi
Trampning aytishicha, narkokartellarning faoliyati o‘tgan yili 200 mingdan ortiq insonning hayotiga zomin bo‘lgan.
AQSh prezidenti Donald Tramp mamlakat giyohvand moddalar savdosiga qarshi kurashni yanada kuchaytirayotganini ma’lum qildi. Uning aytishicha, yaqin vaqt ichida AQSh qurolli kuchlari Lotin Amerikasida joylashgan giyohvand moddalar savdosiga aloqador yer usti obyektlariga ham zarbalar berishni boshlaydi.
Trampning ta’kidlashicha, narkotrafik tufayli o‘tgan yili 200 mingdan ortiq inson halok bo‘lgan. U AQSh tomonidan amalga oshirilayotgan hozirgi choralar natijasida bu ko‘rsatkich pasayganini qayd etdi.
“Biz ular qayerda yashashini, qanday harakat qilishini bilamiz. Quruqlikdagi zarbalarni amalga oshirish ancha oson. Tez kunlarda bu amaliyotni boshlaymiz”, — dedi Tramp.
Davlat rahbari, shuningdek, zarbalar faqat Venesuela hududi bilan cheklanmasligi mumkinligini bildirdi. U Kolumbiyada kokain ishlab chiqarilishi va uning AQSh bozoriga yetkazib berilishi haqidagi ma’lumotlarga ham to‘xtalib, bunga aloqador shaxslarga nisbatan qat’iy choralar ko‘rilishini ta’kidladi.
