Toshkentda 17 kg sintetik giyohvandlik vositalarini tarqatmoqchi bo‘lgan jinoiy guruh qo‘lga olindi
32 yoshli shaxs boshqaruvidagi “Cobalt” avtomobilidan 83 gramm “mefedron” aniqlangan.
Toshkent shahrida sintetik giyohvandlik vositalarini keng miqyosda tarqatishni rejalashtirgan jinoiy guruh fosh etildi. Ichki ishlar vazirligi va Davlat xavfsizlik xizmati tomonidan o‘tkazilgan tezkor tadbirlar davomida dastlab 32 yoshli shaxs boshqaruvidagi “Cobalt” avtomobilidan 83 gramm “mefedron” aniqlangan. Shundan so‘ng amaliyot davom ettirilib, Yunusobod tumanida 18 yoshli uch nafar shaxs qo‘lga olindi.
Ularni tekshirish chog‘ida sumkalardan 730 dona qadoqlangan “mefedron”, shuningdek, ular ijarada yashagan xonadonlardan 354 dona bo‘lakka o‘ralgan “Alfa PVP” va 500 gramm “mefedron” topildi. Tezkor surishtiruv davomida ushbu guruhning asosiy ombor mudiri ham aniqlanib, u va turmush o‘rtog‘ining yashash manzilida katta hajmdagi giyohvand moddalar musodara qilindi.
Mazkur xonadondan 4 kg 200 gramm “Alfa PVP” hamda 9 kg “mefedron” chiqarib olindi. Mutasaddi organlarning ta’kidlashicha, jami 17 kilogramm, ya’ni bir martalik 85 ming dozaga teng sintetik giyohvandlik vositalarining tarqatilishiga chek qo‘yilgan.
Ushbu holatlar yuzasidan Jinoyat kodeksining 273-moddasi 5-qismi bilan jinoyat ishi qo‘zg‘atildi. Gumonlanuvchilarga nisbatan “qamoq” ehtiyot chorasi qo‘llangan bo‘lib, tergov harakatlari davom etmoqda.
