Guliston shahriga 52 ta yangi avtobus keltirildi

Prezident Shavkat Mirziyoyev Guliston shahri jamoat transporti infratuzilmasini takomillashtirish maqsadida olib kelingan zamonaviy avtobuslar taqdimoti bilan tanishdi.

 

Guliston shahridagi ichki yoʻllar boʻylab qatnovlarni amalga oshirish maqsadida 52 ta avtobus olib kelindi. Ular “Yevro-5” standarti talablariga toʻliq javob beradi hamda tabiiy siqilgan gazda harakatlanadi.

 

Har biri 65 nafar yoʻlovchini qulay sharoitlarda manziliga yetkazishga moʻljallangan ushbu avtobuslar past polli boʻlib, nogironligi boʻlgan shaxslarning harakatlanishi uchun maxsus pandus uskunalari va alohida oʻrindiqlar bilan jihozlangan. Yoʻl haqi toʻlovlarini elektron tarzda ham amalga oshirish uchun “ATTO” tizimi oʻrnatilgan.

 

Aholining jamoat transportiga boʻlgan ehtiyoji hisobga olinib, avtobuslar harakati Guliston shahrining 23 ta mahallasini toʻliq qamrab oluvchi jami 7 ta shahar ichki yoʻnalishida brutto-shartnoma asosida harakatlanadi.

 

Natijada avtobuslarning harakat intervali avvalgiga nisbatan 2 barobarga qisqarib, kuniga 29 ming nafar aholiga qulay, xavfsiz va arzon transport xizmatlari koʻrsatilishi taʼminlanadi.

 

Yana bir jihat: mazkur qatnovlar orqali yiliga 38 milliard soʻmdan ziyod transport xizmatlari koʻrsatiladi, 120 nafar ish oʻrni yaratiladi.

 

Davlatimiz rahbari mutasaddilarga yurtimiz shaharlarining jamoat transporti parklarini shunday zamonaviy avtobuslar bilan toʻldirish ishlarini izchil davom ettirish, fuqarolarga sifatli xizmat koʻrsatish boʻyicha koʻrsatmalar berdi.

 

Shu yerda kelgusida 11 metrli, uzoq masofaga moʻljallangan yana 30 ta avtobusni olib kelish rejasi haqida maʼlumot berildi. Ushbu loyiha amalga oshirilsa, qoʻshimcha yana 150 dan ortiq ish oʻrni yaratiladi.