O‘zbekistonda havo sifatini yaxshilash uchun 900 mlrd so‘m yo‘naltiriladi
Mablag‘lar korxonalarda filtratsiya tizimlarini modernizatsiya qilish va havo sifatini yaxshilashga sarflanadi.
2025-yilda O‘zbekistonda atmosfera havosini muhofaza qilish va ekologik vaziyatni yaxshilashga doir loyihalarni moliyalashtirish uchun 900 milliard so‘m ajratilishi rejalashtirilmoqda. Mablag‘lar sanoat korxonalarida filtratsiya va tozalash tizimlarini modernizatsiya qilish, shuningdek, ekologik dasturlarni kengaytirishga sarflanadi.
Bu haqda Bosh vazir o‘rinbosari — iqtisodiyot va moliya vaziri Jamshid Qo‘chqorov Oliy Majlis Qonunchilik palatasiga yo‘llangan deputatlik so‘roviga javoban ma’lum qildi.
Qonunchilik palatasidagi muhokama davomida 2026-yil davlat budjetida ekologiya yo‘nalishidagi loyihalar moliyaviy ta’minoti masalalari ham ko‘rib chiqildi. Ekologiya va iqlim o‘zgarishi milliy qo‘mitasi raisi o‘rinbosari Jusipbek Kazbekovning qayd etishicha, kelasi yilda byudjet qo‘shimcha daromadlari hisobidan yana 548 milliard so‘m ajratilishi rejalashtirilgan.
Mazkur chora-tadbirlar sanoat chiqindilarining zararini kamaytirish, havoning ifloslanish darajasini pasaytirish va aholining sog‘lom yashash sharoitlarini ta’minlashga xizmat qiladi.
