AQSh immigrantlar uchun ish ruxsatnomalarining amal qilish muddatini qisqartirdi
Immigrantlar holatini muntazam tekshirib borish maqsadida ish ruxsatnomalari qisqa muddatga beriladi.
Qo‘shma Shtatlar hukumati qochqinlar, boshpana so‘rovchilari va boshqa immigrantlarga ish ruxsatnomalarini berish tartibini qayta ko‘rib chiqdi. Yangilangan talablarga ko‘ra, mazkur hujjatlarning amal qilish muddati 5 yildan 18 oygacha qisqartirildi.
AQSh Fuqarolik va immigratsiya xizmati ma’muriyati ta’kidlaganidek, ushbu chora-tadbirlar mamlakatda mehnat faoliyati bilan shug‘ullanayotgan xorijliklar ustidan nazoratni kuchaytirishga qaratilgan. Tashkilot direktori Jozef Edlouning ma’lum qilishicha, ruxsatnomalar muddatini qisqartirish murojaat etuvchilarning huquqiy holatini muntazam ravishda baholab borish imkonini yaratadi.
“Bu Qo‘shma Shtatlarda ishlashga intilayotgan shaxslar jamiyat xavfsizligiga tahdid solmasligini ta’minlaydi. Avvalgi ma’muriyat davrida mamlakatga kirishga ruxsat olingan shaxs tomonidan Milliy gvardiya xizmatiga uyushtirilgan hujum shundan dalolat beradiki, tekshiruvlarni tez-tez amalga oshirish zarur,” — dedi Edlou.
Yangi qoida qochqin maqomini olganlar, boshpana berilganlar, chiqarib yuborish jarayoni to‘xtatilgan shaxslar hamda boshpana olish to‘g‘risidagi arizasi ko‘rib chiqilayotganlarga nisbatan tatbiq etiladi. O‘zgarishlar 5-dekabrdan boshlab kuchga kirdi.
