Buyuk Britaniya va Norvegiya dengizda Rossiyaga qarshi dengiz ittifoqini tuzdi
Ittifoqqa 13 ta harbiy kema birlashgan.
Britaniya va Norvegiya Rossiya tomonidan suv osti kabellariga xavf kuchaygani sababli ularni himoya qilish, Rossiya suv osti kemalarini ovlash va Shimoliy Atlantikadagi ahamiyatga ega infratuzilmalarni himoya qilish uchun ittifoq tuzdi. Ittifoqqa 13 ta harbiy kema birlashgan.
Bu kelishuv avvalgi, avgust oyida Norvegiya Britaniyada ishlab chiqarilgan kamida beshta fregatni sotib olish bo‘yicha tuzgan 11 milliard yevrolik shartnomadan keyin imzolanmoqda. Rasmiylarning aytishicha, Norvegiya kemalari va sakkizta Britaniya kemasi NATOning shimoliy qanoti bo‘ylab dengizlarda birgalikda harakat qiladi.
Tomonlarning maʼlum qilishicha, bu kelishuv ikki davlatga o‘zlarini birgalikda himoya qilish imkonini beradi.
Starmer “tarixiy” deb atagan va payshanba kuni Londonda ikki davlat mudofaa vazirlari tomonidan rasman imzolangan ushbu bitimga ko‘ra, Buyuk Britaniya Qirollik Harbiy-dengiz floti o‘zining sirtqi kemalari uchun Norvegiya raketalaridan foydalanishga rozilik bergan.
“Yangi tahdidlar davrida, ayniqsa Rossiyaning Shimoliy Atlantikadagi faolligi ortib borayotgan bir paytda, bizning kuchimiz — qatʼiy harbiy salohiyat va mustahkam ittifoqlardir”, — dedi Britaniya mudofaa vaziri Jon Xili.
Britaniya so‘nggi ikki yil ichida Rossiya harbiy-dengiz faolligi o‘z suvlarida 30 foizga oshganini bildirgan.
NATOning kiber va gibrid tahdidlar bo‘yicha katta eksperti o‘tgan yil oxirida Yevropadagi suv osti kabellariga qilinayotgan doimiy hujumlarni “G‘arb infratuzilmasiga eng faol tahdid” deb atagan edi.
NATOning Innovatsiya, Gibrid va Kiber bo‘yicha vaqtinchalik bosh kotib o‘rinbosari Jeyms Appaturayga ko‘ra, aloqa kabellariga qilingan va alyans tomonidan Rossiyaga nisbat berilgan so‘nggi hujumlar Yevropaga qarshi kiber, gibrid va boshqa tajovuzkor faoliyatning keskin oshganidan dalolat beradi.
Noyabr oyining boshida Shvetsiya va Litva o‘rtasidagi, shuningdek Germaniya va Finlyandiya o‘rtasidagi Baltika dengizidagi ikki kabelning uzilishi NATO va aʼzo davlatlar orasida sabotaj ehtimoli borligi haqida keskin tashvish uyg‘otdi.
Shohjahon Majidov
