Qozog‘istonda transchegaraviy narkotrafik tarmog‘i fosh etildi

 

Qozog‘istonning Chimkent shahrida huquqni muhofaza qiluvchi organlar tomonidan yirik xalqaro narkotrafik tarmog‘i faoliyati to‘xtatildi. Operatsiya davomida ushbu jinoiy guruh tarkibiga kirgan 24 nafar shaxs qo‘lga olindi. Ular orasida O‘zbekiston, Afg‘oniston va Rossiya fuqarolari ham mavjud.

 

Qozog‘iston bosh prokurori Berik Asilovning ma’lum qilishicha, giyohvand moddalar savdosi bilan bog‘liq ushbu jinoiy sxemaga 300 nafardan ortiq shaxs jalb etilgan. Tarmoq a’zolari Telegram messenjeri orqali narkotik vositalarni tarqatish bilan shug‘ullangan, yangi a’zolarga esa noqonuniy preparatlarni ishlab chiqarish bo‘yicha ko‘rsatmalar bergan.

 

Tergov ma’lumotlariga ko‘ra, guruh juda katta miqyosda faoliyat yuritgan: faqat ikki nafar ayblanuvchining noqonuniy savdo aylanmasi 7 million dollardan oshgan. Pul mablag‘lari “dropper”lar kartalari va litsenziyasiz kriptobirjalar orqali o‘tkazilib, xorijiy shaxslar foydasiga yechib olingan.

 

Amaliy tadbirlar davomida Chimkent shahridagi ikkita dorixona faoliyati to‘xtatilib, u yerdan olti kilogrammdan ortiq tayyor mephedron, sotishga mo‘ljallangan qadoqlangan dozalar, ikki tonnadan ziyod prekursorlar hamda dori vositalari ishlab chiqarish uskunalari olib qo‘yildi.

 

Mazkur surishtiruvga Qozog‘iston tezkor-tergov guruhi bilan bir qatorda AQSh Narkotiklarga qarshi kurash boshqarmasi xodimlari ham jalb etilgani qayd etildi.