Talabalarga ham qishki taʼtil 28 dekabrdan boshlanadi
Talabaning qishki taʼtil davrida doimiy yashash hududlariga borib-kelishlarini poyezd va samolyotlar orqali taʼminlash uchun qo‘shimcha imkoniyatlar yaratiladi.
Oliy taʼlim, fan va innovatsiyalar vazirligi tegishli buyrug‘iga ko‘ra, oliy, o‘rta maxsus va kasbiy ta’lim muassasalari hamda akademik litseylar talaba va o‘quvchilarining qishki taʼtil muddati belgilandi. Unga muvofiq, joriy o‘quv yilida qishki ta’til 2025-yil 28-dekabrdan boshlanib, 2026-yil 10-yanvariga qadar davom etadi.
Ta’til davrida talaba va o‘quvchilarning o‘z yashash hududlariga qaytishlarini qulaylashtirish maqsadida Transport vazirligi, “O‘zbekiston temir yo‘llari” AJ va “Uzbekistan Airways” AJ bilan hamkorlikda qo‘shimcha sharoitlar yaratiladi. Bu orqali turli hududlar o‘rtasidagi qatnovlarni optimallashtirish ko‘zda tutilgan.
Shu munosabat bilan, 2025-yil 18-dekabrdan 2026-yil 12-yanvariga qadar talaba va o‘quvchilar uchun yo‘l chiptalari 50 foiz chegirma asosida sotiladi. Chegirma temir yo‘l va aviaqatnovlarning belgilangan yo‘nalishlarida amal qiladi.
Rasmiylarga ko‘ra, bu chora talaba-yoshlarning ta’tilni oila davrasida o‘tkazishi, qaytish jarayonida tirbandliklarni kamaytirish va transport tizimida qulaylik yaratishga xizmat qiladi.
Eslatib o'tamiz, avvalroq maktablarda ham qishki taʼtil 28 dekabrdan boshlanishi xabar qilingan edi. Ta’til davomiyligi 14 kunni tashkil etib, 2026-yil 10-yanvarga qadar davom etadi.
