Toshkentda “aqlli” svetoforlar tizimi joriy etiladi

Toshkent shahrida avtomobillar soni ortib borayotgani sababli yo‘l harakati oqimini boshqarish bo‘yicha yangi tizim joriy etiladi. Hozirda poytaxt ko‘chalarida 800 mingdan ortiq avtomobil doimiy harakat qiladi, kuniga yana 150–300 ming transport kirib kelmoqda. Mutaxassislar ogohlantirishicha, chora ko‘rilmasa, yaqin yillarda tirbandliklar yanada kuchayishi mumkin.

 

Prezident imzolagan qarorga ko‘ra, poytaxtda Yagona yo‘l harakatini tashkil etish markazi ish boshlaydi. Ushbu markaz shahar bo‘ylab harakat oqimini yagona raqamli boshqaruv ostida tartibga solib boradi. Eng muhimi, 600 ta yirik chorraha “raqamli xarita”ga ulanib, svetoforlar sun’iy intellekt yordamida real vaqtda boshqariladi.

 

Rasmiy ma’lumotlarga ko‘ra, yangi tizim tirbandliklarni 30 foizga kamaytirishi, o‘rtacha harakat tezligini 44 km/soatga yetkazishi kutilmoqda. Shuningdek, transport vositalarining svetoforlarda kutish vaqti 35 foizga qisqaradi, bu esa kunlik vaqt tejalishiga sezilarli ta’sir qiladi.

 

Mutaxassislar fikricha, mazkur islohotlar nafaqat yo‘l harakatini optimallashtiradi, balki poytaxtda yashash sifati oshishiga ham xizmat qiladi. Tizimning joriy etilishi ekologik transport bilan uyg‘unlashib, Toshkentni yanada xavfsiz, qulay va musaffo megapolisga aylantirishi kutilmoqda.