OAV: Maduro Trampdan isteʼfoga chiqish evaziga 200 mln dollar so‘radi
Venesuela prezidenti, shuningdek, o‘z safdoshlari uchun amnistiya va do‘st mamlakatdan boshpana so‘ragan.
Xorijiy ommaviy axborot vositalari xabariga ko‘ra, Venesuela prezidenti Nikolas Maduro 21 noyabr kuni AQSH prezidenti Donald Tramp bilan bo‘lgan telefon muloqotida o‘zining 200 million dollarlik shaxsiy aktivlarini saqlab qolish, shuningdek, safdoshlari uchun amnistiya va do‘st mamlakatdan boshpana taqdim etishni so‘ragan. Bu haqda The Telegraph nashri maʼlum qildi.
Nashr manbalariga ko‘ra, tomonlar Venesuelaning ko‘plab amaldorlariga amnistiya berish masalasida kelishuvga erisha olmagan. Shuningdek, o‘tish davri hukumatini shakllantirish va Maduro uchun qaysi davlat boshpana taklif qilishi borasida ham kelishmovchilikka uchragan.
Xabarda aytilishicha, Tramp Venesuela rahbariga Xitoy yoki Rossiyani boshpana sifatida ko‘rib chiqishni taklif qilgan. Maduro esa G‘arbiy yarim sharda qolish tarafdori bo‘lgan. Qatar ikki tomon uchun ehtimoliy murosa varianti sifatida tilga olingan.
Reuters agentligi avvalroq Tramp telefon muloqotida Maduroni bir hafta ichida mamlakatni tark etishga chaqirganini xabar qilgan edi. Mazkur muddat 28 noyabrda yakunlangan. Ertasi kuni AQSH rahbari ijtimoiy tarmoqlardagi murojaatida aviakompaniyalar va uchuvchilarni Venesuela havo hududini to‘liq yopiq sifatida qabul qilishga chaqirgan.
Donald Tramp noyabr oyi oxirida ushbu telefon suhbati bo‘lib o‘tganini tasdiqlagan, biroq tafsilotlarni ochiqlamagan. Uning taʼkidlashicha, Venesuela havo hududi haqidagi bayonot AQSH tomonidan harbiy zarbalar berilishi mumkinligining alomati sifatida talqin qilinmasligi kerak.
