Oʻzbekistonda sogʻliqni saqlash xizmatlariga 10 oyda 16,5 trln soʻm sarflandi
Xizmatlar hajmi oʻtgan yilga nisbatan 15,4 foizga oshgan.
Oʻzbekiston aholisining sogʻliqni saqlash sohasidagi xizmatlarga qilgan xarajatlari ortishda davom etmoqda. Milliy statistika qoʻmitasi ma’lumotiga koʻra, 2025-yilning yanvar–oktyabr oylarida ushbu yoʻnalishdagi bozor xizmatlari hajmi 16,5 trillion soʻmni tashkil etgan. Bu koʻrsatkich oʻtgan yilning shu davriga nisbatan 15,4 foizga koʻpdir va umumiy bozor xizmatlarining 2 foizini tashkil qiladi.
Hududlar kesimida eng katta ulush an’anaviy ravishda poytaxt hissasiga to‘g‘ri keladi. Toshkent shahrida 7,7 trln so‘m, Toshkent viloyatida esa 1,6 trln so‘m xizmat ko‘rsatilgan. Samarqand va Farg‘ona viloyatlarida mos ravishda 1,2 trln va 1,1 trln so‘mlik xizmatlar ko‘rsatilgan, hududlar kesimida esa Namangan, Andijon va Buxoro viloyatlari ham sezilarli ulushga ega.
Qolgan hududlarda sog‘liqni saqlash xizmatlari hajmi quyidagicha taqsimlangan: Qashqadaryo viloyati – 612,8 mlrd so‘m, Xorazm – 557,8 mlrd so‘m, Surxondaryo – 416,8 mlrd so‘m, Jizzax – 398,8 mlrd so‘m, Sirdaryo – 293,1 mlrd so‘m, Qoraqalpog‘iston Respublikasi – 285,6 mlrd so‘m, Navoiy viloyati – 269 mlrd so‘m. Statistik qo‘mita sog‘liqni saqlash xizmatlari hududlar bo‘yicha doimiy o‘sish tendensiyasini qayd etdi.
