Toshkent tumanida 1 mlrd so‘mlik valyuta to‘xtatib qolindi
Ular “tashmachi” fuqarolar yordamida chetga olib chiqib ketilayotgan bo‘lgan.
Davlat xavfsizlik xizmati Toshkent viloyati bo‘yicha boshqarmasi hamda bojxona organlari tomonidan o‘tkazilgan tezkor tadbir natijasida xorijiy valyuta mablag‘larini “tashmachilar” orqali qo‘shni davlat hududiga noqonuniy ravishda olib chiqib ketishga urinishning oldi olindi.
Maʼlum bo‘lishicha, guruh yetakchisi bo‘lgan 1995-yilda tug‘ilgan fuqaro 5 mln 622 ming Rossiya rublini kichik qismlarga bo‘lib, Qozog‘iston Respublikasiga o‘tkazib berish uchun ishonchli shaxsga topshirayotgan vaqtida ashyoviy dalillar bilan qo‘lga olingan.
Tadbir davom ettirilib, gumondorning avtotransport vositasi va yashash manzilida o‘tkazilgan ko‘rik natijasida qo‘shimcha ravishda 11 220 AQSH dollari hamda pul mablag‘larining haqiqiy egalari qayd etilgan daftari rasmiy tartibda hujjatlashtirib olindi.
Mazkur shaxsga nisbatan Jinoyat kodeksining 25, 182-moddasi 2-qismi “a” bandi asosida jinoyat ishi qo‘zg‘atilib, unga nisbatan “qamoq” ehtiyot chorasi qo‘llanilgan. Hozirda surishtiruv-tergov harakatlari olib borilmoqda.
