Namanganda xotinining ukasini o‘ldirgan erkak 12 yilga qamaldi
Fojia ayolning birga yashashni davom ettirishdan bosh tortgani tufayli kelib chiqqan mojaro oqibatida sodir bo‘lgan.
Namangan viloyati sudi tomonidan xotinining ukasini o‘ldirgan erkakka nisbatan hukm e’lon qilindi. Jinoyat ayolning birga yashashni davom ettirishdan bosh tortgani tufayli kelib chiqqan mojaro oqibatida sodir bo‘lgan.
Oliy sud ma’lumotlariga ko‘ra, voqea 20-may kuni Davlatobod tumanida yuz bergan. Sudlanuvchi turmush o‘rtog‘ini qaytarib olmoqchi bo‘lib, uning ota-onasi yashaydigan uyga borgan. Rad javobidan so‘ng qarindoshlar bilan janjal kelib chiqqan va jarayonga ayolning kenja ukasi ham aralashgan.
Mojaro vaqtida sudlanuvchi unga pichoqli qurol qo‘llab, og‘ir tan jarohati yetkazgan. Jabrlanuvchi voqea joyida vafot etgan.
Sud erkakni O‘zbekiston Respublikasi Jinoyat kodeksining 97-moddasi 2-qismi (qasddan odam o‘ldirish) bilan aybdor deb topdi va 12 yilga ozodlikdan mahrum qilish jazosini tayinladi. U jazoni umumiy rejimdagi koloniyada o‘taydi.
