Pokiston–Afg‘oniston chegarasidagi qurolli hujumda 6 harbiy halok bo‘ldi
Shuningdek, yana olti nafar harbiy jarohatlangan.
Pokistonning Afg‘oniston bilan chegaradosh hududi — Kurram viloyatidagi xavfsizlik posti qurollangan guruh tomonidan hujumga uchradi. Rasmiy ma’lumotlarga ko‘ra, hodisa natijasida olti nafar Pokiston armiyasi harbiy xizmatchisi halok bo‘lgan, yana olti nafari jarohat olgan.
To‘qnashuv qorong‘ilik boshlangan paytda davom etgani bois halok bo‘lgan harbiylarning jasadlarini voqea joyidan olib chiqish vaqtincha imkonsiz bo‘lgan. Yaradorlar esa tezkor ravishda yaqin atrofdagi tibbiyot muassasasiga yetkazilgan.
Dastlabki ma’lumotlarga ko‘ra, hujumni amalga oshirgan qurolli shaxslarning ikki nafari yo‘q qilingan, yana ikki nafari jarohatlangan. Voqea yuzasidan tegishli xizmatlar tomonidan surishtiruv ishlari olib borilmoqda.
Pokiston rasmiylari hodisa bo‘yicha xavfsizlik choralarini kuchaytirganini ma’lum qilgan.
