Toshkentda “GDG Tashkent DevFest 2025” texnologiya festivali bo‘lib o‘tdi
5 mingdan ortiq ishtirokchi qatnashgan festivalda Google mutaxassislari va dunyoning bir nechta davlatlaridan kelgan spikerlar so'zga chiqdi.
Toshkent shahrida “Google” kompaniyasi hamkorligida tashkil etilgan “GDG Tashkent DevFest 2025” xalqaro texnologiya festivali bo‘lib o‘tdi. Tadbir ingliz tilida o‘tkazildi va unda Google Developers Group (GDG) yetakchilari, Google Developer Expertlar hamda bir qator xalqaro kompaniyalar mutaxassislari ishtirok etdi.
GDG — Google texnologiyalariga qiziquvchi ishlab chiquvchilar va IT mutaxassislarining global hamjamiyati bo‘lib, O‘zbekistonda 2019-yilda tashkil etilgan. Hamjamiyat bugunga kelib 8 900 dan ziyod a’zolarga ega. O‘tgan yili DevFest 2024 tadbirida 3 000 kishi qatnashgan bo‘lsa, bu yilgi festivalda 5 000 dan ortiq ishtirokchi jamlandi.
Tadbir davomida generativ sun’iy intellekt, Cloud arxitekturasi, Machine Learning, Android, Flutter, Firebase kabi yo‘nalishlarda mahorat darslari, amaliy mashg‘ulotlar va prezentatsiyalar o‘tkazildi. EXPO hududida 10 dan ortiq texnologik kompaniyalar o‘z xizmatlarini taqdim etdi, shuningdek 15 ta workshop tashkil qilindi.
Festivalda AQSh, Polsha, Rossiya, Ruminiya, Malayziya va BAAdan mutaxassislar ishtirok etdi. Ular orasida O‘zbekiston raqamli texnologiyalar vaziri Sherzod Shermatov, Google muhandisi Oleg Arvin, Mohirdev asoschisi va NLP injeneri Adham Zohirov, TikTok kompaniyasi vakili Darkhanbek Mamatalyyev, Yandex mutaxassisi Aleksey Prixodko, Bank of America xodimi Islombek Abdulxatov, Pinterest vakili Diyorbek Sadullayev kabi ma’ruzachilar bor.
Adham Zohirov “Human-AI Collaboration” mavzusidagi chiqishi davomida sun’iy intellektning inson bilan hamkorlikda rivojlanishi, AI modellarini o‘qitishda sifatli ma’lumotlar muhimligi va AI vositalaridan foydalanish orqali tezroq natijalarga erishish mumkinligi haqida so‘z yuritdi.
“GDG Tashkent DevFest 2025” O‘zbekiston IT hamjamiyati uchun global tajriba almashinuvi, yangi texnologiyalar bilan yaqindan tanishish va xalqaro mutaxassislar bilan muloqot qilish imkoniyatini yaratdi.
