Fermerlarga chorvachilik uchun o‘z yerida bino qurishga ruxsat beriladi

 

Prezidentning qishloq xo‘jaligi sohasi xodimlari bilan o‘tkazilgan uchrashuvda bozorlarda narxlar barqarorligini ta’minlash hamda oziq-ovqat xavfsizligini mustahkamlash choralari muhokama qilindi.

 

“Kuz-qish mavsumida asosiy turdagi mahsulotlar zaxirasini shakllantirdik. Endi bu jarayon yil davomida amalga oshiriladi va narxlarni barqaror ushlab turish uchun doimiy interventsiya tizimi yo‘lga qo‘yiladi”, — dedi davlat rahbari.

 

Yuqori talabga ega bo‘lgan ozuqabop, moyli ekinlar va kartoshka yetishtiruvchilarni qo‘llab-quvvatlash uchun yangi mexanizmlar joriy etiladi. Xususan, kelgusi yilda fermerlarga 2025-yilda olinadigan hosil qiymatining 50 foizigacha Qishloq xo‘jaligi jamg‘armasi hisobidan 12 foizli kreditlar ajratiladi.

 

Xorijiy valyutadagi kreditlarda 8 foizdan ortiq stavka qismi qoplab beriladi, kreditlarning 50 foizgacha qismiga kafillik taqdim etiladi. Har yili “in-vitro” laboratoriyalarda virusdan xoli 10 milliondan ortiq kartoshka mini-tuganaklari ishlab chiqarilib, urug‘chilik xo‘jaliklariga bepul taqdim etiladi.

 

Chorvachilikni rivojlantirish ham muhim yo‘nalish sifatida belgilandi. Kelgusi yilda chetdan 100 ming bosh qoramol va 200 ming bosh qo‘y-echki olib kelish rejalashtirilgan. Paxta va g‘alla yo‘nalishidagi fermerlarga o‘z yerida chorvachilikni yo‘lga qo‘yishi uchun 20 sotixgacha maydonda yengil konstruksiyadagi bino qurishga ruxsat beriladi.

 

Nasldor qoramol va bir kunlik jo‘ja importi bo‘yicha subsidiyalar berish tartibi yana 5 yilga uzaytiriladi. Chorvachilik loyihalarini moliyalashtirish uchun keyingi yilda Jahon banki va Qishloq xo‘jaligini qo‘llab-quvvatlash jamg‘armasi mablag‘lari hisobidan 157 million dollar yo‘naltiriladi. Ushbu kreditlar 10 yillik muddatga, 3 yillik imtiyozli davr bilan 17 foizlik stavkada beriladi.

 

Shuningdek, qo‘shimcha ravishda JICA’dan 150 million dollar va Osiyo taraqqiyot bankidan 60 million dollar jalb etiladi. Bu resurslar chorvachilikni kengaytirish, kelgusi yilda qiymati 5 trillion so‘mlik 1 mingta loyihani amalga oshirishga xizmat qiladi. Fransiya tajribasi asosida 167 ta tumanda 50–60 bosh qoramolga mo‘ljallangan 340 ta kichik chorvachilik xo‘jaligi tashkil etilishi belgilangan.