“Mirzacho‘l” innovatsion qishloq xo‘jaligi maktabi tashkil qilinadi

 

“Mirzacho‘l” klasteri cho‘l hududida paxta hosilida bu yil 50–55 sentnerdan hosil oldi. Unga birlashtirilgan 27 nafar fermer esa hosildorlikni 85 sentnergacha yetkazdi. Bu tajriba Prezident Shavkat Mirziyoyevning qishloq xo‘jaligi sohasi xodimlari bilan muloqotida tilga olindi.

 

Ushbu tajribani ommalashtirish maqsadida Mirzacho‘lda innovatsion qishloq xo‘jaligi maktabi tashkil qilinmoqda. Butun respublikadan 1 ming kishi fermer maktabida cho‘l sharoitida paxta etishtirish bo‘yicha o‘qiydi. Maktabni tamomlagan va sertifikat olgan fermerlarga reytingda qo‘shimcha 10 ball beriladi.

 

Ilg‘or fermerlarni usta sifatida kam hosil olgan fermerlarga qo‘shish orqali ikki tomonlama foydali tizim joriy etilgan. Ustoz fermerlar shogird fermerlarga o‘z tajribasini o‘rgatib, hosilni 50 sentnerdan orttirishga yordam bersa, 5 million so‘m mukofot oladi.

 

Shuningdek, Agrar universitetning 180 talaba dual ta’lim asosida ilg‘or klaster va fermerlarda ishlab, agronomlik sirlarini o‘rganadi. Har bir talaba uchun fermer va klaster 5 million so‘m oladi, talabaga esa 1,5 million so‘m ajratiladi. Tajriba va ko‘nikma orttirgan yosh agronomlar qishloq xo‘jaligiga ixtisoslashgan 167 tuman korxonalariga yo‘naltiriladi.

 

Yosh agronomlar ishlab chiqarish korxonalariga yangi texnologiyalar va sifatli urug‘larni joriy qilishi, hosildorlikni oshirish va xarajatlarni kamaytirishga ko‘maklashishi rejalashtirilgan. Buning uchun ular oylik 2 ming dollar miqdorida ta’minlanadi. Shu yo‘l bilan agronomlik yoshlar uchun jozibador kasblardan biriga aylantiriladi.