AQSh vositachiligida Tailand va Kambodja o‘t ochishni to‘xtatdi
Donald Tramp tomonlar oktabrdagi tinchlik kelishuviga qaytishga tayyor ekanini bildirdi.
AQSh prezidenti Donald Tramp Tailand va Kambodja bosh vazirlari — Anutin Charnvirakul va Khun Manet bilan muzokaralar o‘tkazdi. AQSh yetakchisining ma’lum qilishicha, tomonlar 12-dekabr oqshomidan boshlab sulh tuzishga kelishib olgan.
Trampning ta’kidlashicha, Tailand va Kambodja oktabr oyida erishilgan tinchlik kelishuviga qaytishga tayyor. Bu haqda u Truth Social ijtimoiy tarmog‘idagi sahifasida yozib qoldirdi deydi media.az nashri.
“Ikki ajoyib va gullab-yashnayotgan mamlakat o‘rtasida katta urushga aylanishi mumkin bo‘lgan muammoni hal qilish uchun Anutin va Xun Manet bilan hamkorlik qilganimdan faxrlanaman”, — deb yozdi AQSh prezidenti.
Shuningdek, Donald Tramp Malayziya Bosh vaziri Anvar Ibrohimga mojaroni hal etish jarayonidagi vositachiligi va ko‘rsatgan yordami uchun minnatdorlik bildirdi.
Eslatib o‘tamiz, Tailand va Kambodja o‘rtasidagi keskinlik 8-dekabr kuni Tailand armiyasi bahsli chegara hududlari bo‘ylab havo hujumlarini boshlaganidan so‘ng yana avj oldi. Tailand Qirollik armiyasi Kambodja kuchlarini 7-dekabr kuni Sisaket provinsiyasida Tailand harbiy xodimlariga hujum qilganlikda ayblagan.
Bunga javoban, Kambodja kuchlari kichik qurollar va raketa otish moslamalaridan foydalangan. Kambodja Mudofaa vazirligi esa, o‘z navbatida, mojaro Tailand kuchlarining hujumi bilan boshlanganini ma’lum qilgan.
