Tramp bayonotiga qaramay, Tailand–Kambodja chegarasida to‘qnashuvlar davom etmoqda
Tomonlar AQSh prezidenti bayonotini hozircha rasman tasdiqlamadi.
AQSh prezidenti Donald Tramp Tailand va Kambodja o‘rtasida sulhga erishilganini e’lon qilganiga qaramay, ikki davlat o‘rtasidagi harbiy to‘qnashuvlar to‘xtamadi. Bu haqda Reuters axborot agentligiga tayanib Report xabar bermoqda.
Ma’lum qilinishicha, Tramp tomonlar uning vositachiligida sulh bo‘yicha kelishuvga erishganini bildirgan. Biroq Tailand va Kambodja rasmiylari ushbu bayonotni hozircha tasdiqlamagan.
Kambodja Axborot vazirligi ma’lumotlariga ko‘ra, Tailand qurolli kuchlari bahsli chegara hududlarida harbiy harakatlarni, jumladan, qiruvchi samolyotlar orqali zarbalar berishni davom ettirgan. Rasmiylarga ko‘ra, portlashlar sulh e’lon qilinganidan keyin ham qayd etilgan.
O‘z navbatida, Tailand harbiylari Kambodjani xalqaro huquq normalarini buzishda ayblab, tinch aholi punktlariga hujumlar uyushtirilayotganini hamda Tailand nazorati ostidagi hududlarga minalar o‘rnatilayotganini ma’lum qildi.
Vaziyat mintaqada keskinligicha qolmoqda, tomonlar o‘rtasidagi qarama-qarshi ayblovlar esa davom etmoqda.
