O‘zbekistonda retseptsiz dori savdosi uchun javobgarlik kuchaytirilishi mumkin
Deputat Alisher Qodirov dori vositalarini shifokor tavsiyasisiz sotishga qarshi qat’iy choralar ko‘rishni taklif qildi.
O‘zbekistonda retseptsiz dori sotganlik uchun javobgarlikni yanada kuchaytirish bo‘yicha taklif tayyorlanishi rejalashtirilmoqda. Bu haqda “Milliy tiklanish” demokratik partiyasi raisi, deputat Alisher Qodirov ma’lum qildi. Uning ta’kidlashicha, dori-darmon bozorida daromad ortidan quvish ayrim hollarda inson salomatligini ikkinchi darajaga tushirib qo‘ymoqda.
Deputatning fikricha, bemorni “tovar” sifatida ko‘rish amaliyotiga barham berish va dori ichish masalasini faqat shifokor hal qilishi kerak. U qandli diabet kabi surunkali kasalliklarda asossiz ravishda qimmat va samarasiz dorilar tavsiya etilayotganini tanqid qilib, bu holat jamiyat salomatligiga jiddiy xavf tug‘dirishini qayd etdi.
Amaldagi qonunchilikka ko‘ra, kuchli ta’sir qiluvchi moddalarni retseptsiz sotganlik uchun 2 million so‘mdan 4 million so‘mgacha jarima belgilangan. Shu bilan birga, 2025-yil 10-dekabrdan boshlab ayrim hududlarda elektron retsept tizimi joriy etildi. Sog‘liqni saqlash vazirligi e’lon qilgan yangi ro‘yxatga ko‘ra, retseptsiz beriladigan dori vositalari soni 400 tadan kam bo‘lib, bu avvalgi yillarga nisbatan qariyb ikki barobar qisqartirilgan.
