Samarqandning ayrim hududlarida 20 yildan so‘ng issiqlik ta’minoti tiklanmoqda
22 ta ijtimoiy soha obyekti hamda 381 ta ko‘p qavatli uy issiqlik energiyasi bilan uzluksiz ta’minlanishi rejalashtirilgan.
Samarqand shahrining “Sattepo”, “Sug‘diyona” va “Mikrorayon” hududlarida uzoq yillik tanaffusdan so‘ng markazlashgan issiqlik ta’minoti qayta yo‘lga qo‘yilmoqda. Natijada 22 ta ijtimoiy soha obyekti hamda 381 ta ko‘p qavatli uy issiqlik energiyasi bilan uzluksiz ta’minlanadi.
Loyiha doirasida “RK-2” markaziy qozonxonasida umumiy uzunligi 39,4 kilometr bo‘lgan teng qobiqli issiqlik quvurlari yotqizilmoqda. Shuningdek, umumiy quvvati 100 MVt bo‘lgan 3 ta zamonaviy qozonxona qurilishi rejalashtirilgan.
Mazkur ishlar aholi yashash sharoitini yaxshilash, ijtimoiy obyektlar faoliyatini barqaror ta’minlash hamda energiya samaradorligini oshirishga xizmat qiladi. Bu haqda Qurilish va uy-joy kommunal xo‘jaligi vazirligi matbuot xizmati ma’lum qildi.
